Ka dy dekada që në Shqipëri po ndryshojnë emrat e rrugëve dhe shesheve, simbolet themelore të shtetit dhe emrat e institucioneve. Në të vërtetë absolutisht ka qenë i domosdoshëm ky proces i rishikimit të “emërtimeve” dhe natyrisht edhe “fushata antikomuniste” e cila ka qenë herë normale dhe herë e “sforcuar”. Procesi i riemërimit të rrugëve, shesheve dhe emrave të institucioneve të jetës publike në Shqipëri ende nuk ka përfunduar. Në të vërtetë këtu nuk ka asgjë që të jetë absurd apo paradoksale sepse ndryshimet nuk janë qëllim në vetvete, por ato janë të lidhura jo vetëm me nevojën e korrigjimit të së vërtetës historike, por në thelb ato pasqyrojnë në mënyrë adekuate pjekurinë e shoqërisë civile.