Pak ditë përpara publikimit të dokumenteve zyrtarë nga AKEP në lidhje me  tenderin e licencës 3G, operatorët e telefonisë celulare AMC, Eagle Mobile, Plus dhe Vodafone ranë dakord që të kërkojnë zyrtarisht rishikimin e vendimit të qeverisë për të dhënë vetëm një licencë 3G. Rreziqet e një favorizimi të një ambienti monopol dhe çmimi i lartë hyrës në kuotën e 12.5 milionë eurove janë shqetësimet e kompanive celulare që operojnë në Shqipëri.Katër operatorët e licensuar të telefonisë celulare në Shqipëri AMC, Eagle Mobile, Plus dhe Vodafone kanë mirëpritur vendimin e qeverisë për të shtyrë përpara dhënien e licensave 3G, ndonëse ata besojnë se kufizimi i dhënies së një license të vetme përmes tenderit publik mund të rrezikojë procesin dhe të krijojë monopol ne tregun shqiptar. Katër operatorët e telefonisë celulare janë të bindur se lëshimi njëkohësisht i katër licensave 3G kundrejt një tarife të favorshme për të gjithë spektrin e vlefshëm 3G, u shërben objektivave të qeverisë dhe nevojave në rritje të konsumatorëve për internet të shpejtë me bandë të gjerë, me qëllim për të inkurajuar një treg konkurrues dhe për të nxitur më tej investimet në vend. Dhënia  e katër licensave 3G në të njëjtën kohë do të sjellë një shumëllojshmëri të produkteve dhe  shërbimeve me çmime më konkurruese për qytetarët. Për më tepër futja e rrjetit 3G  do të ishte më e shpejtë për mbulimin e të gjithë territorit të vendit. Shteti do të përfitojë më shumë të ardhura për buxhetin nga tarifat e paguara nga të katër operatorët e licensuar dhe investimet e bëra për teknologjinë 3G nga këta operatorë, që do të kenë një efekt pozitiv në GDP dhe rritjen e nivelit të punësimit. Katër operatorët e telefonisë celulare e shohin me keqardhje faktin e vënies së një tarife prej 12.5 milionë  Euro, e cila bashkë me investimin shtesë që nevojitet për futjen e rrjetit, e bën jashtëzakonisht të paarsyeshëm për të justifikuar vendimet logjike për të investuar ne teknologjinë 3G sikundër dëshmon edhe eksperienca mbarë evropiane. Shqipëria ka qenë nismëtare e zhvillimit të komunikimit celular në vitet 1990-të, por aktualisht renditet e fundit në Evropë për sa i takon  përhapjes së teknologjisë 3G. Është mjaft e rëndësishme që qeveria të demonstrojë vullnetin e saj politik për të përshpejtuar përhapjen e teknologjisë 3G  dhe për të hapur tregun me internet të shpejtë pa krijuar pengesa të panevojshme. Për arsyet e mësipërme, operatorët e telefonisë celulare mbeten dyshues mbi këtë vendim të qeverisë. Si rrjedhojë, përpara publikimit zyrtar të dokumenteve të tenderit, katër kompanitë e telefonisë celulare i bëjnë thirrje autoriteteve shtetërore të diskutojnë më tej me të gjitha palët e përfshira dhe operatorët për arritjen e një zgjidhje të përshtatshme.